إسكتش طاقة
القدر
[تدخل بهية وهي تنادي على سعدية وسعدية تمسك المصحف]
سعدية : إيوة يا بومة ، فيه إيه؟
بهية : بتعملي إيه يا بت ؟
سعدية : أديني بقرالي شوية قرآن عشان ربنا يكرمني بالمال وابن الحلال والعيال.
بهية : إسفوخص عليكي وعلى شعلقتك في الدنيا ، يعني مش بتقري القرآن عشان
ربنا يرضى عنك ،وتموتي شهيدة في سبيل الله.
سعدية : فال الله ولا فالك يا فقر .
بهية: هي الشهادة في سبيل الله وحشة ، دي حتى أحسن موتة ، ولا عايزة تخللي في
الدنيا زي جدتك ستيتة أم أعرض ودان (تضحك بسخرية).
سعدية: إحنا لسانا شباب يا بوذ الغراب ، نعيش ونفرح ونتهني ، ولما نوصل سن
المعاش نبقى نفكر في الموت ، ونروح كمان الحج (تضحك بــبلاهة).
بهية : ربنا يهديكي يا أختي ، طيب مش هتروحي معاية نصلي التراويح في الجامع.
سعدية(بعد وجوم): هاه
بهية (في أذن سعدية بصوت عالٍ): نصلي التراويح في الجامع.
سعدية : روحي لوحدك ، أنا هصلى هنا.
بهية : ليه بس؟
سعدية : الجامع بعيد ، والشيخ بيقعد نص ساعة في الصلاة .
بهية (لنفسها): طب أفهمها إزاي دي.
بهية (لسعدية): ما هي كل خطوة هتمشيها ، ليكي بيها حسنة ،وكمان الدعاء في
الجامع مستجاب ،دول حتى بيقولوا النهاردة ليلة القدر ، يمكن لما تروحي تطلعلك
طاقة القدر ، و ساعتها إدعي باللي بتتمنيه .
بهية [ تعرض بوجهها عن سعدية محدثة نفسها] : أقولك إيه بهيمة وما بتفهميش
غير كدة.
سعدية : يعني طاقة القدر هتخرم سقف الجامع؟؟؟؟!!!!!
بهية : يا غبية يا طابونة ، إنتي إدعي وربك يستجيب ، وتشوفي نور ربنا قدامك،
ساعتها قلبك هيتطمن وترتاحي وتطلبي منه اللي بتتمنيه ، بس إنتي إنوي الخير
وقولي يا رب.
سعدية : يا رب ، يا رب ، يا رب ........ ياللا بينا يا بت.
بهية : ياللا بينا..
[تخرج الأختان]
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
[في الطريق إلى المسجد]
عملتيها إنك جيتي معاية ...... سعدية ......... سعدية ....... مالك يا سعدية ؟!
[ سعدية في ذهول و وجوم ]
بهية : إيه ده ؟؟؟؟؟؟؟؟؟؟؟!!!!!!!!!!!!!!!!! طاقة القدر ........
يا رب اصلح حالنا لأحسن حال ، واغفر لينا وللمسلمين واحفظ بلادنا من كل سوء ياااااااااااارب.
سعدية : مال وابن حلال وعيال، عيال عيال عيال ، عيال عيال عيال ، عيال عيال عيال.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
[بعد فترة تتحدث بهية من وراء الكواليس]
سعدية : ألو .... بس يا واد ... بس يا بت ..... بس يا ولاد الفرطوس .....منكم لله ...
يا واد.... يا بت ...... جننتوووووووني.
ـــــــــــــــــــــــــــــــــــــــــــــــــــــــــــ
ستار
#رفات عمر
تعليقات: 0
إرسال تعليق